我相信好多人都用呢種思維做決定，爭在諗得有幾detail，資訊有幾多。
我睇國民教育，都係用呢種角度睇。政府搞國民教育，都係想下一代愛國愛黨，令佢地相信我地國家同黨有幾勁，有幾進步，等我地下一代對國家同黨忠心耿耿。如果政府可以洗腦洗到咁，咁佢地推國教用o既錢係值得使o既。但係，宜家政府話國教唔係洗腦，花咗錢又洗唔到腦，咁重乜野要慷納稅人之慨，花呢D冤枉錢呢﹖
我強烈要求政府提出理據，證明佢地搞國民教育真係可以洗到腦，欺騙到我地下一代相信我地國家同黨點樣偉大，如果唔係請立即撤回，慳返我地D 血汗錢。
我做採購每日都要同好多國內o既人溝通，甚至我起海港城返工，一落樓周圍八成係大陸人。有一次，我去工廠，起高速塞撚咗三個鐘，戇鳩鳩之際同工廠經理同埋司機傾開國民教育。佢地話細細個學校就教佢地愛國愛黨，共產黨係進步、無私與團結的執政集團。到佢地讀完書，出o黎做野，工廠同政府部門好多接觸，佢地耳濡目染，原來乜野都要比錢疏通。甚至驗一批貨，都明碼實價，以每隻櫃計，唔疏通驗貨員就雞蛋挑骨頭，批貨唔使走。佢地話依家o既大陸，腐敗到離哂譜。個個都隻眼開隻眼閉，令呢種風氣蔓延。
呢個現實同佢地起學校老師教o既，有好大o既落差，眼見為真，最後佢地心裡清楚共產黨其實並唔係進步、無私與團結的執政集團，而係貪污腐敗o既執政集團，而且對呢個灌輸錯誤觀念o既政府懷有恨意。
起大陸資訊封閉o既情況下尚且分得到青紅皂白，起資訊發達o既香港，你呃到細路一時，呃唔到佢地一世。洗腦教育o既錢洗咗出去，都係徒勞無功，永遠做唔到洗腦效果，根本係做緊一D冇成本效益o既野。
我條氣最唔順係果D民生問題少少成績都未有，就嘥鳩埋D無謂錢推一D唔work o既野。你將我地D 血汗錢倒落鹹水海，九月九號，D 票dump 落鹹水海都唔投比保皇黨。
